Job 18

Impendulo kaBhilidadi

1 Kwathi lapho uBhilidadi umShuhi waphendula wathi,

2 “Koze kube nini ulokhu uphethe emlonyeni? Vusingqondo andubana sikhulume.

3 Kungani usithatha njengezinkomo kube ingathi siyizithutha kuwe na?

4 Wena ozidabudabulayo ube yiziqa ngokuzonda kwakho, uthi sesingawudela umhlaba ngenxa yakho? Loba uthi amadwala agudlulwe ezindaweni zawo na?

5 “Isibane somubi siyacima; ilangabi lomlilo wakhe liyaphela ukubhebha.

6 Ukukhanya ethenteni lakhe kuba mnyama; isibane esiseceleni kwakhe siyacima.

7 Izisinde zakhe zamandla ziyadeda; lamacebo akhe yiwo amlahla phansi.

8 Izinyawo zakhe zimbeka emambuleni acine esemthandele.

9 Umjibila umhwiphula ngesithende; isihitshela simuthi nko.

10 Isihitshela usifihlelwe phansi; umjibila uthukuziwe endleleni yakhe.

11 Uyethuka ngokwesaba inxa zonke kumlandelele langaphi aya khona.

12 Umonakalo umlambele; incithakalo imlindele nxa esiwa.

13 Kudla ingxenye yesikhumba sakhe; izibulo lokufa lidla izitho zakhe.

14 Uyasuswa ekuvikelekeni kwethente lakhe aqhutshwe asiwe enkosini yokwesaba.

15 Umlilo uhlala ethenteni lakhe; isolufa evuthayo ichithachithwe emzini wakhe.

16 Izimpande zakhe ziyabuna ngaphansi lamagatsha akhe abune ngaphezulu.

17 Ukukhunjulwa kwakhe kuyaphela emhlabeni; kalabizo elizweni.

18 Uyasuswa ekukhanyeni aye ebumnyameni njalo axotshwe emhlabeni.

19 Kalabantwana loba isizukulwana ebantwini bakibo, kakho loyedwa owakhe lapho ake ahlala khona.

20 Abantu bentshonalanga bayanengwa yisiphetho sakhe; abantu bempumalanga bayatshaqeka.

21 Ngempela linjalo ikhaya lomuntu omubi; yiyo indawo yalowo ongamaziyo uNkulunkulu.”